cmimetPoeti dhe studiuesi, Agim Vinca është laureat i Çmimit Kombëtar Letrar për Vepër Jetësore “Azem Shkreli”.Në një ceremoni solemne të premten, ministri i Kulturës, Rinisë dhe Sportit (MKRS), Memli Krasniqi ia ka ndarë çmimin Vincës e po ashtu edhe laureatëve të Çmimeve vjetore për Letërsi për vitin 2013.
Çmimi për veprën më të mirë në prozë për vitin 2013 i është ndarë Drenusha Zajmi-Hoxhës për romanin “Krrokamat”.
Çmimi për veprën më të mirë në poezi i është ndarë Adem Gashit për veprën poetin “Kthimi i pamundur, Lady” dhe Sabit Rrustemit për vëllimin “Murale Shpirti”.
Çmimi për veprën më të mirë në kritikë letrare i është ndarë Merxhan Avdylit me përmbledhjen e studimeve “Dritësime letrare” dhe Flamur Malokut për studimin e tij “Polisemia e veprës: lexime empirike mbi poezinë e Sali Bashotës”.
Ndërkaq, Çmimi për veprën më të mirë të përkthyer në shqip ose nga shqip në gjuhë tjera i është ndarë Izet Sylajt për përkthimin nga frëngjishtja në shqip të romanit “Tregoju për betejat, mbretërit dhe elefantët” të autorit Mathias Enard.
Ministri Krasniqi vlerësoi krijimtarinë e laureatëve, e në veçanti kontributin e Agim Vincës në letërsi, publicistikë por edhe në Universitetin e Prishtinës, ku edhe është profesor.
Ai ka thënë se shteti ka institucionalizuar përkujdesjen ndaj krijuesve në shumë fusha të kulturës. “Ndarja e Çmimit Kombëtar Letrar për Vepër Jetësore ‘Azem Shkreli’ dhe Çmimeve Vjetore për Letërsi është tashmë çdo vit, një ditë e veçantë. MKRS po e institucionalizon respektin për artistët dhe krijuesit. Përpos çmimeve në letërsi ne kemi themeluar dhe ndarë edhe çmimet në kinematografi, teatër, muzikë. Ne po rrisim çdo vit përkrahjen për librin. Mendoj se është e rëndësishme se kemi krijuar një trend të rritjes së buxhetit”, ka thënë Ministri Krasniqi.
Nga ana tjetër, Agim Vinca ka deklaruar se është shprehur i nderuar për çmimin, duke falënderuar MKRS-në dhe jurinë. Ai ka theksuar se shkrimtari Azem Shkreli ka qenë një inspirim për të. “Njeriu pavarësisht nga mosha mendon se veprën me të mirë do ta krijojë ne të ardhmen. Çmimet letrare i bëjnë edhe më shumë jehonë veprës dhe krijimtarisë dhe kjo nuk është pak”, ka thënë ai.
Çmimi Kombëtar Letrar për Vepër Jetësore “Azem Shkreli” kap vlerën financiare, pesëmijë euro, ndërsa secili çmim vjetor 2 mijë e 500 euro.